自己都輕鬆紮到! 日系女生必學紮髮技巧

唔知有冇 Sis 同小編一樣都咁鍾意日系髮型？ 特別係日系嘅編髮，有蓬鬆感又唔覺散亂，仲帶有甜美嘅感覺添！以為一定好複雜好難紮？等小編介紹幾款自己動手就紮到嘅日系髮型，等大家擺脫沉悶嘅長髮啦！

重複繞圈編髮

信唔信只需要3條橡筋就可以完成靚靚編髮？秘訣就係將頭髮分成3層，第1至第3層做法一樣，抓起頭髮用橡筋紮起之後將尾段部份繞一圈攝返入去，然後拉鬆部份頭髮，新嘅一層就綁喺舊嗰層上面，如此類推，簡直係快靚正嘅代表～如果想頭髮更有曲線美，亦都可以喺紮之前夾一夾曲髮尾～

高馬尾+辮子

先將頭髮紮成高馬尾，然後將頭頂部份嘅頭髮輕輕拉鬆，跟住將馬尾部份分成3束，逐束綁成辮子，再輕輕拉鬆辮子左右嘅頭髮，最後將3條辮子隨意咁繞埋一齊就完成啦～唔想紮單調馬尾嘅Sis不妨試下呢款～

低馬尾+辮子

首先留起兩側嘅頭髮，然後將中間嘅頭髮綁成低馬尾。兩側嘅頭髮做法一樣，將頭髮分成兩份，然後左右繞起頭髮，繞完綁起之後就拉鬆頭髮，將兩側嘅綁子由馬尾嘅底部攝入，圈住馬尾橡筋嘅部份繞住馬尾，最後用髮夾固定就得啦～

雙辮子髮型

想髮型特別D，更加甜美可愛？可以試下呢隻雙辮子嘅髮型。首先將左右兩側嘅頭髮紮起繞圈，將紮起咗嘅頭髮尾段分成左右兩部份，同其餘嘅頭髮一齊紮成兩條辮子，然後拉鬆頭髮，將兩條辮子繞幾圈，繞成一條就得啦～如果想塊面顯瘦D，紮之前記得留返少少頭髮喺面嘅兩側就得啦～

以上4款日系編髮都非常簡單，唔需要特別嘅技巧，鍾意日系造型嘅Sis仲唔快D喺屋企試下？